開開心心上學去～

話說小豆返學第二日就病，第一星期只係返左三日學（仲要搞到成家都病左）。到第二個星期就唔可以陪啦，第一天未踏入課室就已經見到校長企左o係小豆課室門外，仲要關上門。後來聽返D家長講，原來我地課室情況幾惡劣，有人喊到嘔，有人要衝出門口， haha.... 小豆自己入課室時都OK，但係放學時佢就話自己喊左少少，話我要媽媽wor.... 老師就話唔係喊左好耐。不過放學後流鼻涕情況嚴重，所以星期二三都無返學。
到星期四再返學，搭車時仲好正常，但係入課室時就有少少喊話要我陪。不過我放低佢，bye bye 後即閃，交俾老師啦。。。放學後見佢已收聲，老師話佢喊到茶點都無食，同埋因為啱啱病完，話佢應該會喊多幾日....
原本我同老公都覺得小豆返學係唔會喊，點知都係有喊 。。

學校之前話初期可以俾小朋友帶一件心愛的玩具返學校，所以第二日我俾小豆帶左隻最鍾意的羊羊公仔返學。搭車途中又係正常的，點知臨落車係咁話「我好肚餓呀，返屋企煮飯俾我食呀」（明明食飽先出門口的，講到自己好似好陰公咁。。。），連俾佢攬住羊羊都唔肯。上到課室喊住交俾老師後又即閃，因為老師話太多的糾纏只會令佢地更唔捨得。接放學時又無喊lu...

學校逢星期五會派手冊，今個星期佢有提我地在家應多D同小朋友講，例如：媽媽好錫你架，放學一定會黎接你架； 老師都好錫你架wor, 好似媽媽一樣，有咩野都可以話俾老師知～
之前老師都有分享過佢地初期喊可能係因為不安，在一個陌生的環境，媽媽又唔係身邊，究竟佢會唔會黎接我呢？又可能係平時o係屋企幾free, 想食想玩想去廁所話黎就黎啦，但係返到學校咁多規矩，食個茶點又要tea time song，去廁所又要排隊一齊去，可能佢地會覺得唔如意，所以就喊。。。所以要多D 同佢傾下，瞭解下係咩原因喊。

原本諗住過左個weekend,小豆返學可能又喊過，但係反而又無野wor, 入課室bye bye 後都無喊，到放學見到我仲好開心tim~~ 佢有時會講，食完茶點媽媽真係黎帶我wor .... 唔知係咪因為老師咁同佢講呢。。。
返屋企玩煮飯仔，煮完仲問駛唔駛唱tea time song 先食呀。。哈哈。。

(翻譯:
Tea time tea time fun fun fun
Food and drink for everyone

May I have my tea time please?
yes, you may)

hahaha XDDDD


到星期二，我話唔好帶羊羊返學啦，交俾細佬照顧住佢啦，又ok wor.. 希望可以keep住啦～～

題外話，學校洗手間D姐姐都幾有心機幫＆教小朋友自己如廁，洗手。。。小豆宜家成日話「阿芳姐教我唔好痴咁埋洗手，唔係整濕晒件衫啦」... 仲有平時洗完手一係我就嗱嗱聲幫佢抺，一係由得佢求其抺 （汗。。:P) 。但係姐姐好有耐性咁教識佢要抺完手掌抺手背～～
再題外話，小豆戒片已經成功lu... 返學都唔駛著片啦，係唯一一次去party 玩得太開心唔記得就瀨左lor.... :)

報K1學生相

其實如果小豆讀得開心，我呢個懶媽媽真係想抖下唔報其他學校的K1。。。奈何小豆PN班唔 guarantee 全部直升，咁即係我一定要做野啦，如果唔係就無書讀啦。。。

雖然啱啱先影完學生相，但係報其他學校的K1，費事用著校服的學生相啦。。。所以都係去返之前影開o個度影。。。
原本只係二選一，諗住要上面正經D o個張，但係其實我自己係鍾意下面sweet D.... 搞黎搞去，為免自己後悔，都係要o徒多左$＄，要晒兩張，睇下apply  咩類型學校用邊張啦...
你地又覺得邊張好D 呢？

開學了～

八月十一日小豆開始踏入人生另一階段，終於開學啦～～黎緊我同佢都會有好多個第一次呀～
頭兩個星期每日都係返一個鐘，同埋將一班分成兩GROUP 上，等老師可以照顧好D先同埋小朋友可以習慣下先～

第一次返學，小豆都好興奮。之前特登執左個櫃桶仔俾佢，同佢講返學的底衫，底褲仔，襪都係放o個度的。臨返學前個weekend,因為已經攞左書包，佢得閒就揹晒書包，自己去櫃桶攞襪著襪著鞋扮返學 ：）

星期一一起身（風雨不改，8點前就起身），小豆就問係咪返學呀，不過頭兩個星期我地返第二group (11-12點），所以換校服前佢都問左好幾次返學未呀？？ ：）

出發lu~~ 幾得戚（唔知邊度學返黎，成日影相都V）

第一次搭校車，小豆好好奇又好開心咁，因為佢自己一個人坐，我就坐佢後面。全程車佢都坐定定，雙手扶實扶手，無搞安全帶。希望趁8月我可以陪佢搭車教好佢，等佢第時自己搭車我都安心少少～

入課室開頭都OK的，不過過左一半之後，唔知係眼訓定見到有D小朋友又走黎走去，佢聽聽下故事又走過黎坐唔定。。。搞到老師都要話下佢。。話咁快一個鐘就過，臨走前老師提大家氹小朋友時要小心用詞，千祈唔好話“老師鬧ga" ，要慢慢氹～ 

第二日～

仲早過尋日起身，我都心諗死梗啦，返學又眼訓又會忸忸計計。。。

今日開始要佢地熟悉學校的規矩，書包放邊，換完鞋放邊等等。好彩今日有得o係playground 玩，之後又有得玩呢塊布，小豆超開心，同老師一齊唱ABC歌同Twinkle twinkle little star唱得超大聲。

之後就要佢地自己著返鞋，老師同我講小豆今日好乖呀，佢仲同英文老師讚小豆" She is doing very good today"。雖然唔係讚D特別野，但係起碼在老師心目中，都係一個可以乖到的小朋友啦。 

跟住排隊洗手然後食茶點，之後要坐定等聽故事，可能老師見小豆坐得定，好似好專心咁，所以個故事其中一個主角係叫左做小豆個名（我話好似好專心咁，因為我睇到小豆個樣，其實應該係眼訓，所以眼定定發呆中。。。wakakaXDDD)... 

兩日小豆都係一放學就訓著左，遲D自己搭車都擔心佢搭車中眼訓，唔知點算好....

跟住。。。唉，五點幾同小豆沖涼，個身好似熱熱地咁，幫佢探熱38.5度，嗱嗱聲落去睇醫生。。。人地話返學易病姐，唔駛咁快掛。。。咁快聽日就要第一次請病假 。。。

戒片大作戰（二）

一個星期過去，我諗小豆算戒片成功掛～～
Day 3 開始，小豆訓晏覺話唔要著片wor, 咁我見佢之前兩日訓醒晏覺條片都係乾ge, 咁就訓之前同佢去一次先，鋪多張床墊就由得佢唔著片訓，一起身就去 wee wee 先，咁多日都無瀨濕過。至於日頭佢都習慣左會停低唔玩住，急就要去左先，但係有一兩次行得慢得滯瀨左，咁佢瀨左就又同佢講一番道理先幫佢換。小豆好搞笑，行去廁所時，佢會講 “左扭扭右扭扭，唔係瀨左就弊啦”，可能我成日同佢講呢本書，佢學埋我講啦～：）

出街佢都會叫去廁所，不過暫時都仲著片先，萬一去唔切都唔會呢咁hea... 同埋宜家開始o係街明明呢頭去完，o個頭又話要去洗手間洗手lor...=_=

戒片大作戰尚算成功，但小豆仍需努力吧～